ऑर्डनन्स फॅक्टरीत संप; कामकाज ठप्प

Primary tabs

म. टा. प्रतिनिधी, पुणे संरक्षण उद्योग टिकून रहावा, त्याचे खासगीकरण केले जाऊ नये यासाठी देशभरातील संरक्षण कामगारांनी संप पुकारला आहे. त्यामुळे पुण्यातील खडकी आणि देहूरोड येथील ऑर्डनन्स फॅक्टरींसह राज्यातील विविध फॅक्टरी आणि वर्कशॉपमधील कामकाज ठप्प झाले होते. पुढील दोन दिवस हा संप चालू राहणार असल्याने संरक्षण उत्पादनावर मोठा परिणाम होणार आहे. ऑल इंडिया डिफेन्स एम्प्लॉइज फेडरेशन, भारतीय प्रतिरक्षा मजदूर संघ, इंडियन नॅशनल डिफेन्स वर्कर्स फेडरेशन या संघटनांनी पुकारलेल्या या तीन दिवसीय संपात देशभरातील चार लाखांहून अधिक संरक्षण कामगार संपात सहभागी आहेत. पुण्यातील खडकी येथील ऑर्डनन्स फॅक्टरीबाहेर या संपाचे नेतृत्व बीपीएमएसचे राष्ट्रीय सहसचिव ज्ञानेश्वर जाधव, एआयडीईएफचे राष्ट्रीय सचिव रवींद्र रेड्डी आणि इंटकचे राष्ट्रीय सचिव सुभाष वाघमोडे यांनी केले. खडकी येथील ऑर्डनन्स फॅक्टरी अंतर्गत येणारी पाच युनिट्स, अतिउच्च क्षमता दारूगोळा निर्मिती कारखाना, देहूरोड फॅक्टरीअंतर्गत येणारी दोन युनिट्समधील कामकाज ठप्प झाले होते. यामधील ग्रुप ए अधिकारी, अग्निशामक कर्मचारी व अत्यावश्यक कामासाठीचे कर्मचारी वगळता सर्व कर्मचारी संपात सहभागी झाले आहेत. हवाई दलाशी निगडित पुण्यातील दोन डेपोमधील कामकाज सुरू ठेवणे आवश्यक असल्याने हे दोन्ही डेपो कार्यरत आहेत. मिलिटरी इंजिनीअरिंग सर्व्हिसेस व आर्मी बेस वर्कशॉपमधील कर्मचारीही संपात सहभागी आहेत. 'ऑर्डनन्स फॅक्टरी उत्पादित करत असलेल्या २७५ उत्पादनांना 'नॉन कोअर' घोषित करण्याचा निर्णय मागे घ्यावा, सर्व फॅक्टरींना पुरेसे काम द्यावे, खासगीकरण व आऊटसोर्सिंग बंद करावे, २००४ नंतर भरती झालेल्या कामगारांसाठीची 'न्यू पेन्शन स्कीम' रद्द करून जुनी पेन्शन लागू करावी या आमच्या मागण्या आहेत. त्या सरकारने मान्य न केल्याने हा संप पुकारला असून पुढील दोन दिवसात बंदची व्याप्ती आणखी वाढेल,' असे बीपीएमएसचे राष्ट्रीय सहसचिव ज्ञानेश्वर जाधव यांनी सांगितले.
मोबाइल अॅप डाउनलोड करा आणि राहा अपडेट