कॉलेजच्या चुकीमुळे ५० जण अनुत्तीर्ण

Primary tabs

Harsh.Dudhe@timesgroup.com@HarshDudheMTपुणे : सिंहगड कॉलेज ऑफ सायन्सच्या प्रशासनाने 'इंटर्नल'चे ५० पैकी गुण देण्याऐवजी, २५ पैकी गुण दिल्याने एमएस्सी कम्प्युटर सायन्स अभ्यासक्रमाचे ६२ पैकी ५० विद्यार्थी सावित्रीबाई फुले पुणे विद्यापीठाच्या सत्र परीक्षेत अनुत्तीर्ण झाले आहे. या संपूर्ण प्रकारात कॉलेजचे प्रशासन दोषी असतानादेखील वेतन न दिल्याने नोकरी सोडलेल्या एका प्राध्यापिकेवर चुकीचे खापर फोडण्यात येत असल्याचे संबंधित प्राध्यापिकेने सांगितले आहे.विद्यापीठाने नोव्हेंबर-डिसेंबर महिन्यात घेतलेल्या एमएस्सी कम्प्युटर सायन्स अभ्यासक्रमाच्या सत्र परीक्षेचा निकाल नुकताच जाहीर केला आहे. या परीक्षेत एमएस्सी कम्प्युटर सायन्सला द्वितीय वर्षाच्या विद्यार्थ्यांना तिसऱ्या सत्रात सॉफ्ट स्किल्स नावाचा विषय आहे. या विषयाला ५० इंटर्नल गुण आहेत. कॉलेजच्या प्राध्यापकांनी त्यांच्या 'लॉग इन'मधून विद्यार्थ्यांना मिळालेले गुण भरायचे असतात. प्राध्यापकाने ५० पैकी गुण भरण्याऐवजी २५ पैकी गुण भरले आहेत. त्यामुळे २० पेक्षा कमी गुण मिळालेले सुमारे ५० विद्यार्थी अनुत्तीर्ण झाले आहेत, तर २० पेक्षा अधिक गुण मिळविणारे साधारण १२ विद्यार्थी अनुत्तीर्ण झाले आहेत. हे विद्यार्थी अनुत्तीर्ण झाल्यामुळे त्यांना खासगी कंपन्या आणि उद्योगांमध्ये इंटर्नशिप करण्यात अडचणी निर्माण होऊ शकतात, तर भविष्यात नोकरी मिळवतानाही अडचणींचा सामना करावा लागू शकतो. विद्यार्थ्यांनी कॉलेजचे प्राचार्य डॉ. मगन घाटुळे यांच्याकडे या प्रकाराची तक्रार केली आहे. निकालाच्या गुणपत्रिकेत अशा प्रकारचे गुण येणार नाहीत, असे आश्वासन कॉलेज प्रशासनाने विद्यार्थ्यांना दिले आहे. विद्यापीठाच्या वेबसाइटवर ऑनलाइन जाहीर झालेल्या निकालातील गुण हे गुणपत्रिकेत येतात. त्यामुळे गुणपत्रिकेत कोणते बदल कॉलेज प्रशासनाकडून करण्यात येतील, याबाबत प्रश्चचिन्ह उपस्थित करण्यात आले आहे. दरम्यान, या चुकीसाठी जबाबदार धरण्यात आलेल्या प्राध्यापिकेने गुण भरण्यापूर्वीच वेतन आणि इतर कारणांनी नोकरी सोडली असून, तिचा या गुणांशी संबंध नसल्याचे प्राध्यापिकेने सांगितले. त्यानंतर कॉलेजच्या एका प्राध्यापकाच्या लॉग इनमधून विद्यापीठाच्या वेबसाइटवर गुण भरण्यात आल्याने चूक झाल्याचे समोर आले आहे. ही परिस्थिती असताना चुकीचे खापर संबंधित प्राध्यापिकेवर फोडण्यात येत आहे. संबंधित प्राध्यापिकेला सिंहगड एज्युकेशन सोसायटीने नोकरी सोडल्याचे पत्र देखील दिले आहेत. एमएस्सी कम्प्युटर सायन्स अभ्यासक्रमाच्या द्वितीय वर्षातील विद्यार्थी चुकीच्या इंटर्नल गुणांमुळे अनुत्तीर्ण झाल्याची तक्रार प्राप्त झाली आहे. विद्यार्थ्यांच्या गुणपत्रिका अजून न आल्याने याबाबत फारसे बोलता येणार नाही. विद्यार्थ्यांचे नुकसान होणार नाही, याची काळजी कॉलेज प्रशासन घेईल.- डॉ. मगन घाटुळे, प्राचार्य, सिंहगड कॉलेज ऑफ सायन्स
मोबाइल अॅप डाउनलोड करा आणि राहा अपडेट