गेवराई - गावातील एकाशी झालेल्या वादातून पोलिसांनी केलेली मारहाण सहन न झाल्याने रागाच्या भरात तरुणाने पोलिस चौकीसमोर जाळून घेतल्याची घटना मादळमोही (ता. गेवराई) येथे शनिवार (ता. चार) सांयकाळी साडेसहाच्या सुमारास घडली. या घटनेनंतर गावातील संतप्त नागरिकांनी पोलिस चौकीवर हल्ल्याचा प्रयत्न केला मात्र सरपंचांच्या मध्यस्थीनंतर तो टळला. गावकऱ्यांचा रुद्रावतार पाहून चौकीतील पोलिस पळून गेले. गावात तणावपूर्ण शांतता असून बंदोबस्त तैनात करण्यात आला आहे. दरम्यान, या तरुणावर बीड जिल्हा रुग्णालयात उपचार सुरू असून तो सत्तर टक्के भाजला आहे.

श्रीनगर - काश्‍मीर खोऱ्यात गेले दोन दिवस झालेल्या हिमवृष्टीमुळे जम्मू-श्रीनगर महामार्ग वाहतुकीसाठी बंद ठेवण्यात आला आहे, असे अधिकृत सूत्रांनी सांगितले. सीमा रस्ते संघटनेच्या वरिष्ठ अभियंत्यांनी दिलेल्या माहितीनुसार,""बनिहाल आणि पटणीटॉप भागातील हिमवृष्टी थांबल्यामुळे रस्त्यावर साठलेला बर्फ बाजूला करण्याचे काम वेगाने सुरू आहे. जवाहर बोगद्याच्या परिसरातही चार इंचांपर्यंत बर्फ साचल्याने या भागातील वाहतूक बंद ठेवण्यात आली आहे.'' श्रीनगर विमानतळावरील प्रमुख धावपट्टी आणि परिसरातही हिमवर्षाव झाल्यामुळे सकाळच्या वेळेतील अनेक उड्डाणे रद्द करण्यात आली होती.

मडिकेरी (कर्नाटक) - निसर्गधाम या पर्यटन ठिकाणी माकडांनी घातलेला उच्छाद संपविण्यासाठी वनविभागाने पावले उचलली आहेत. आज (शनिवार) सकाळपर्यंत सुमारे 40 हून अधिक माकडांना पकडण्यात वनविभागास यश आले असून, पकडलेल्या माकडांना सुरक्षित ठिकाणी नेऊन सोडण्यात येणार आहे. जणू एखादी युद्धमोहिम हाती घेतल्यासारखे वनविभागाची टीम या प्रकरणात लक्ष घालत आहे. वन अधिकारी अचाप्पा यांनी पत्रकारांना याबाबत अधिक माहिती दिली. ते म्हणाले, की निसर्गधाम हे एक प्रसिद्ध ठिकाण असून, अनेक पर्यटक येथे भेट देतात. तेव्हा येथे असलेल्या माकडांचा त्यांना भरपूर त्रास सहन करावा लागतो.

दुबई - भारताचा फलंदाज विराट कोहली याने जागतिक एकदिवसीय फलंदाजांच्या क्रमवारीत तिसरे स्थान मिळविले आहे. तर कर्णधार महेंद्रसिंह धोनी पाचव्या स्थानावर आहे. कोहलीच्या कारकिर्दीतील ही सर्वोत्तम क्रमवारी आहे. आंतरराष्ट्रीय क्रिकेट परिषदेने (आयसीसी) आज (शनिवार) प्रसिद्ध केलेल्या आकडेवाडीनुसार पहिल्या दहा गोलंदाजांमध्ये एकही भारतीय गोलंदाजाचा समावेश नाही. गोलंदाजांमध्ये श्रीलंकेचा लसिथ मलिंगा पहिल्या स्थानावर आहे. फलंदाजांमध्ये दक्षिण आफ्रिकेचे फलंदाजी हाशिम आमला पहिल्या आणि एबी डिव्हिलियर्स दुसऱ्या स्थानावर आहे.

संत कबिरनगर- उत्तर प्रदेशात कोणत्याही राजकीय पक्षासोबत कॉंग्रेस आघाडी करणार नाही, असे स्पष्टीकरण कॉंग्रेसचे सरचिटणीस राहुल गांधी यांनी आज (शनिवार) दिले आहे. उत्तर प्रदेशचा मुख्यमंत्री कॉंग्रेस पक्षाचा राहील, असा दावाही त्यांनी यावेळी केला. मेहदवाल येथे झालेल्या प्रचार सभेत बोलताना राहुल म्हणाले,""उत्तर प्रदेशात कॉंग्रेस सत्तेवर येणार आहे. उत्तर प्रदेशचा मुख्यमंत्री कॉंग्रेस पक्षाचा राहील. त्यामुळे निवडणुका झाल्यावर कोणत्याही राजकीय पक्षासोबत आघाडी केली जाणार नाही. आमची केवळ उत्तर प्रदेशच्या नागरिकांशी आघाडी असेल. लोकांचा आवाज लखनौपर्यंत पोहोचण्यासाठी पारदर्शी प्रशासन आणले जाईल.

स्टॉकहोम - काय असेल ते असो, पण स्वीडनमधील अनेक जोडप्यांचा कल आशियाई मुले दत्तक घेण्याकडे असतो. भारतातूनही अनेक मुले या देशात दत्तक गेली आहेत. इंडोनेशियाही मागे नाही. सुमारे ३० वर्षांपूर्वी इंडोनेशियातील एका दांपत्याने आपल्या जुळ्या मुलींपैकी एकीला स्वीडनमधील एका जोडप्याला दत्तक दिले.

नवी दिल्ली - २ जी स्पेक्ट्रम गैरव्यवहार प्रकरणात पी. चिदंबरम यांना सहआरोपी करण्यासाठी सुब्रह्मण्यम स्वामी यांनी दाखल केलेली याचिका सीबीआय न्यायालयाने फेटाळल्याने आपल्याला आश्चर्य झाले नसल्याचे, केंद्रीय दूरसंचार मंत्री कपिल सिब्बल यांनी म्हटले आहे. सिब्बल म्हणाले, ''माझ्यासाठी न्यायालयाचा हा निर्णय कोणताही आश्चर्य देणारा नाही. विरोधी पक्षातील काही नेते कायमच टीका करीत असल्याने दुःख होते.'' सुब्रह्मण्यम स्वामींच्या याचिकेवर आज (शनिवार) न्यायालयाने सुनावणी करीत याचिका फेटाळून लावली. त्यामुळे चिदंबरम यांना मोठा दिलासा मिळाला असून, ते पंतप्रधान डॉ. मनमोहन सिंग यांची भेट घेण्याची शक्यता आहे.