शरद पवारांनी घेतली राज्यपालांची भेट

मुंबई : राष्ट्रवादी काँग्रेस पक्षाचे प्रमुख शरद पवार यांनी आज महाराष्ट्राचे राज्यपाल भगतसिंह कोश्यारी यांची सदिच्छा भेट घेतली. यावेळी राष्ट्रवादी काँग्रेसचे प्रफुल्ल पटेल हे देखील उपस्थित होते. गेल्या काही दिवसांपासून राज्यातील महाविकास आघाडी सरकार व राज्यपाल यांच्यामध्ये संघर्षाचे वातावरण पाहायला मिळत आहे. अशातच आज महाविकास आघाडी स्थापण्यात महत्वाची भूमिका बजावणा-या शरद पवार यांनी राज्यपालांची भेट घेतल्याने राजकीय वर्तुळात चर्चांना उधाण आले आहे.

राज्य सरकार अपयशी, महाराष्ट्रात राष्ट्रपती राजवट लागू करा; राणेंची राज्यपालांकडे मागणी

मुंबई (प्रतिनिधी) : राज्याचे माजी मुख्यमंत्री व भाजपचे खासदार नारायण राणे यांनी आज राजभवन येथे राज्यपाल भगतसिंह कोश्यारी यांची भेट घेतली. त्यांनी राज्य सरकार अपयशी ठरल्याने राज्यात राष्ट्रपती राजवट लागू करण्याची मागणी केली आहे. या मागणीवरून राज्यातले राजकीय वातावरण तापण्याची चिन्हे आहेत.

मुंबईत संशयित माओवाद्याला अटक

मुंबई : मुंबईत दरोडा टाकण्यासाठी आलेल्या संशयित माओवादीला राज्य दहशतवादविरोधी पथकाने (एटीएस) बेड्या ठोकल्या आहेत. दलविरसिंग बलवंतसिंग रावत ( ३४) उर्फ पप्पू नेपाळी असे त्याचे नाव असून त्याच्याविरुद्ध मुंबईसह देशभरात दरोडे, जबरी चोरीचे गंभीर गुन्हे नोंद आहेत.
याच दरोड्याच्या रकमेतून तो माओवादी संघटनेला मदत करत असल्याची माहिती एटीएसला मिळाली असून त्यानुसार तपास सुरू आहे. एटीएसने दिलेल्या माहितीनुसार, मुंबई, ठाणे, नवी मुंबईत त्याच्याविरुद्ध ३० हून अधिक गुह्यांची नोंद आहे. त्यानुसार त्याच्याकडे एटीएस कसून चौकशी करत आहे.

कामगारांना आता महाराष्ट्रात येताना पोलिसांची परवानगी घेतल्याशिवाय येता येणार नाही, योगी आदित्यनाथ यांच्या विधानावर राज ठाकरे यांचे उत्तर

मुंबई : उत्तर प्रदेशचे मुख्यमंत्री योगी आदित्यनाथ यांनी त्यांच्या राज्यातील कामगार हवे असल्यास सरकारची परवानगी लागेल असे म्हटले आहे. यावर मनसे प्रमुख राज ठाकरे यांनी योगी आदित्यनाथ यांनी जसे म्हटले आहे कामगारांसाठी परवानगी घ्यावी. तसेच आता यापुढे महाराष्ट्रात येताना येथील पोलिसांची परवानगी घेतल्याशिवाय येता येणार नाही हे योगी आदित्यनाथ यांनी लक्षात ठेवावे, असे म्हटले आहे. त्याचसोबत महाराष्ट्रातल्या राज्य सरकारने सुद्धा या गोष्टीकडे गांभीर्याने लक्ष द्यावे. तसेच कामगारांना आतमध्ये आणताना त्यांची नोंद करावी आणि स्टेशनमध्ये त्यांचे फोटो असावेत.

दोन महिन्यानंतर दिल्लीहून पहिले विमान पुण्याला पोहचले

मुंबई : आज सोमवारपासून पुन्हा एकदा देशांतर्गत विमान सेवेला प्रारंभ झाला. दिल्लीहून सकाळी पहिले विमान पुण्यासाठी झेपावले. तर मुंबईहून पाटणासाठी सकाळी ६.४५ वाजता इंडिगोच्या विमानाने टेक ऑफ घेतला, असे मुंबई विमानतळाचे नियोजन करणाऱ्या MIAL ने म्हटलं आहे. मुंबई विमानतळावरून २५ विमानांचे उड्डाण आणि २५ विमानांच्या लँडिंगला परवानगी देण्यात आली आहे. राज्याचे अल्पसंख्याक मंत्री नवाब मलिक यांनी काल ही माहिती दिली होती. मुंबईतील करोनाचा वाढता प्रादुर्भाव पाहता राज्य सरकारने मुंबईतून विमान सेवा सुरू करण्यास सुरुवातीला नकर दिला होता.