पुणे - चांगल्या परताव्याची हमी देऊन सात मूकबधिरांकडून एकाने सुमारे 12 लाख रुपये गोळा केले... एका वर्षात पैसे परत करण्याची त्याने हमीदेखील दिली होती... पाच वर्षे झाली तरी पैसे परत मिळाले नाहीत. अखेर त्या युवकांनी पोलिस आयुक्त मीरा बोरवणकर यांच्याकडे धाव घेतली अन्‌ सर्वांना पैसे परत मिळाले. मूकबधिर असले तरी त्यांच्या भाषेत त्यांनी पोलिसांचे कौतुक केले. मूकबधिर असलेले सातही जण छोटे-मोठे व्यवसाय करतात. मूकबधिर असलेल्याच एका व्यक्तीने त्यांना खानापूरमधील त्याच्या जागेवर कारखाना उभारतो आहे, असे सांगितले.

पुणे - आगामी महापालिका निवडणुकीत 50 टक्के महिला उमेदवार असल्याने प्रचारातही महिलांचे प्रमाण वाढताना दिसत आहे. महिला उमेदवार आपल्याबरोबर महिलांना घेऊन जाण्यास प्राधान्य देत आहेतच. त्याचबरोबर पुरुष उमेदवारही घराघरांतील महिला मतदारांशी संपर्क साधण्यासाठी महिला प्रचारकांना पसंती देत आहेत. यंदा प्रचारामध्ये महिलांची संख्या लक्षणीय आहे. पक्षाची उमेदवारी निश्‍चित झालेल्या उमेदवारांच्या प्रचारासाठी पक्षातील इतर महिला जात आहेत पण ज्यांची उमेदवारी अजून पक्षाकडून घोषित झाली नाही किंवा ज्या अपक्ष लढणार आहेत, त्या मैत्रिणी, नात्यातील महिलांना बरोबर घेऊन प्रचार करत आहेत.

पुणे - आदरातिथ्य अन्‌ पाककौशल्यात वर्चस्व राखत "आतिथ्य 2012' स्पर्धेच्या विजेतेपदाचा करंडक एआयएसएसएमएस संस्थेच्या कॉलेज ऑफ हॉटेल मॅनेजमेंट ऍण्ड केटरिंग टेक्‍नॉलॉजीने शुक्रवारी पटकाविला. ऑल इंडिया श्री शिवाजी मेमोरिअल सोसायटीतर्फे या राष्ट्रीय पातळीवरील स्पर्धेचे आयोजन करण्यात आले. देशभरातील 22 महाविद्यालयांचे संघ त्यामध्ये सहभागी झाले. "सकाळ' या स्पर्धेचा माध्यम प्रायोजक होता.

पुणे - निवडणुकांपूर्वी शहर पोलिस दलातील सर्व अधिकाऱ्यांनी गोळीबाराचा सराव पूर्ण करण्याचे आदेश आयुक्त मीरा बोरवणकर यांनी दिले आहेत. वडाची वाडी येथे असलेल्या "फायरिंग रेंज'मध्ये हा सराव सुरू असून पाच दिवसांत सुमारे शंभर अधिकाऱ्यांनी तो पूर्ण केला आहे. पोलिस उपायुक्त (मुख्यालय) शिरीष सरदेशपांडे म्हणाले, ""पोलिस अधिकाऱ्यांना दर वर्षी गोळीबाराचा सराव करण्यासाठी संधी दिली जाते.

पुणे - जात पडताळणी प्रमाणपत्र दाखल न करणे, शपथपत्रावर स्वाक्षरी नसणे अशा विविध कारणांमुळे पन्नासहून अधिक उमेदवार महापालिका निवडणुकीच्या रिंगणातून बाहेर फेकले गेले आहेत. चार जणांच्या अर्जांबाबतचा निर्णय प्रलंबित ठेवण्यात आल्याने त्यांच्यावर टांगती तलवार आहे. अर्जच अवैध ठरल्यामुळे काही प्रभागांतील राजकीय चित्र बदलले आहे. कोथरूड क्षेत्रीय कार्यालयांतर्गत प्रभागातील एकही उमेदवार बाद झाला नाही, तर संगमवाडी क्षेत्रीय कार्यालयात छाननीचे काम उशिरापर्यंत सुरू होते. महापालिका निवडणुकीसाठी दाखल झालेल्या उमेदवारी अर्जांची छाननी करण्याची प्रक्रिया शुक्रवारी पूर्ण झाली.

पुणे - स्वारगेट येथील प्राप्तिकर विभागाच्या कार्यालयातून धनादेश चोरून वेगवेगळ्या नावाने बॅंकांमधून परस्पर रक्कम काढणाऱ्या गिरीश ऊर्फ शैलेश ऊर्फ लालचंद पटेल (रा. 1523, शुक्रवार पेठ) याच्याविरुद्ध गुन्हा दाखल करण्यात आला आहे. प्राप्तिकर अधिकारी जलजा सुभाष जाधव यांनी या बाबत पोलिसांकडे फिर्याद दिली. पटेलने प्राप्तिकर कार्यालयातून धनादेश चोरून अधिकाऱ्यांच्या बनावट सह्या करीत बॅंकेतून दोन लाख 13 हजार रुपये परस्पर काढून घेतले. एप्रिल ते जून 2011 या कालावधीत हा गैरप्रकार घडल्याचे उघडकीस आले आहे. निरीक्षक एस. एन. कांबळे तपास करीत आहेत.

पिंपरी - पिंपरी-चिंचवड महापालिका निवडणुकीसाठी राष्ट्रवादी कॉंग्रेसने निश्‍चित केलेल्या बहुसंख्य उमेदवारांत राज्य ग्राहक सल्लागार समितीचे अध्यक्ष आणि पक्षाचे शहराध्यक्ष आझम पानसरे यांनी शिफारशी केलेल्या 47 कार्यकर्त्यांची वर्णी लागल्याचे समजते. अन्य उमेदवारी मिळालेल्यांमध्ये महापौर योगेश बहल, आमदार विलास लांडे, लक्ष्मण जगताप आणि अण्णा बनसोडे यांच्या कार्यकर्त्यांचा समावेश आहे. उपमुख्यमंत्री अजित पवार यांनी स्वतः लक्ष घालून व सर्व गटातटांचा समतोल राखण्याचा प्रयत्न करून उमेदवारीचे वाटप केले, असे सांगण्यात आले.