परभणी - तालुक्‍यातील दैठणा गटात चारही प्रमुख राजकीय पक्षांच्या उमेदवारांनी गेल्या काही दिवसांपासून विविध क्‍लृप्त्या अवलंबून प्रत्यक्ष भेटी-गाठींवर लक्ष केंद्रित केले आहे. दरम्यान, निर्णायक ठरणाऱ्या स्थलांतरित मतदारांना आपलेसे करण्यासाठी उमेदवारांचे आटोकाट प्रयत्न सुरू असून, दैठणाच्या तिरंगी लढतीत कोण बाजी मारणार, याकडे सर्वांचेच लक्ष लागले आहे. या गटात खरी लढत शिवसेना व राष्ट्रवादी कॉंग्रेसच्या उमेदवारांत होणार आहे. या गटाअंतर्गत येणाऱ्या दैठणा व धसाडी या दोन्ही गणांतील लढतीतही रंगत निर्माण झाली आहे.

बीड - महाराष्ट्राच्या राजकारणात मी गेल्या 35 वर्षांपासून काम करीत आहे. सर्वच पक्षांतील राज्यस्तरीय नेत्यांपासून ते जिल्हास्तरीय नेत्यांशी आपले स्नेहाचे संबंध आहेत. मी कोणत्याही नेत्याचे घर फोडण्याचे काम केले नाही, उलट राज्यमंत्री प्रकाश सोळंके यांचे फुटणारे घर मीच वाचविले, असे सांगून राज्यमंत्री प्रकाश सोळंके यांनी केलेल्या टीकेला उत्तर दिले. केज तालुक्‍यातील बनसारोळा येथे आयोजित जाहीर सभेत मुंडे बोलत होते. शुक्रवारी (ता.3) राज्यमंत्री प्रकाश सोळंके यांनी "निलंगेकर, मोहिते, हिरे यांची घरे कुणी फोडली' असा सवाल उपस्थित करीत खासदार मुंडे यांच्यावर घर फोडल्याचे आरोप केले होते.

चाकूर - तरुण व उच्चशिक्षितांना निवडणुकीत संधी देणारा राष्ट्रवादी हा एकमेव पक्ष आहे. पक्षाची विचारधारा आवडल्याने हजारो तरुण राष्ट्रवादीत प्रवेश करीत आहेत. या तरुणांना नेतृत्व करण्याची संधी मिळावी यासाठी राष्ट्रवादीच्या उमेदवारांना विजयी करून पक्षाची ताकद वाढवा, असे आवाहन उपमुख्यमंत्री अजित पवार यांनी केले. जिल्हा परिषद व पंचायत समितीच्या निवडणुकीत राष्ट्रवादी कॉंग्रेसचे उमेदवार ऍड. युवराज पाटील, करीम गुळवे, चंद्रकांत मारापल्ले यांच्या प्रचारार्थ उपमुख्यमंत्री श्री. पवार यांची शनिवारी (ता. 4) येथे सभा झाली. माजी राज्यमंत्री बाळासाहेब जाधव अध्यक्षस्थानी होते.

उमरगा/मुरूम - विरोधकांकडे कुठलीही दिशा नाही. दिशाहीन राजकारणामुळे लोकांचे प्रश्‍न सुटत नाहीत. केंद्र व राज्य सरकार आर्थिकदृष्ट्या सक्षम असून, ग्रामपातळीवर राबविण्यात येणाऱ्या विविध योजनांचा फायदा जिल्हा परिषद, पंचायत समितीच्या माध्यमातून करून घेण्यासाठी मतदारांनी कॉंग्रेसच्या उमेदवारांना विजयी करावे, असे आवाहन मुख्यमंत्री पृथ्वीराज चव्हाण यांनी केले. जिल्हा परिषद, पंचायत समितीच्या निवडणुकीतील कॉंग्रेस उमेदवारांच्या प्रचारासाठी मुरूम (गणेशनगर, ता. उमरगा) येथे शनिवारी(ता. चार) आयोजित सभेत मुख्यमंत्री चव्हाण बोलत होते.

औरंगाबाद - महापालिका कर्मचाऱ्यांच्या वेतनातून "समूह विमा'च्या नावाखाली डिसेंबर आणि जानेवारी महिन्याच्या वेतनातून प्रत्येकी 269 रुपये कापल्याने कर्मचाऱ्यांमध्ये शनिवारी (ता. चार) संभ्रमाचे वातावरण होते. महापालिकेच्या वतीने विमा कंपनीला 12 लाख रुपयांचा धनादेशही देण्यात आल्याचे समजते. विमा काढण्यासाठी ज्या लोकांनी आक्षेप घेतला होता, त्यांचेही पैसे कपात करण्यात आले. महापालिकेत काम करीत असलेले अनेक कर्मचारी अशिक्षित आहेत. यामुळे त्यांना विम्याचा भविष्यात फायदा होईल, या उद्देशाने इंडिया फस्ट लाईफ इन्शुरन्स कंपनीकडून कर्मचाऱ्यांचा समूह विमा काढण्याचा निर्णय घेण्यात आला होता.

परळी - "खासदार गोपीनाथ मुंडे यांनाच मी पक्षात नको होतो. त्यामुळे त्यांनी आपली कोंडी केली. परळी पालिकेत भारतीय जनता पक्षाचा अध्यक्ष होत होता. मात्र, त्यांनी अट्टहास धरून हे "महाभारत' घडविले,'' असा आरोप करून ""गोपीनाथ मुंडे मोठे आहेत, म्हणून ते बोलतात तेच खरे आणि आपण लहान आहोत म्हणून आपले खोटे ठरवले जात आहे,'' अशी खंत भाजपचे बंडखोर आमदार धनंजय मुंडे यांनी "सकाळ'शी बोलताना व्यक्‍त केली. ""परळी नगरपालिकेत भाजपचाच नगराध्यक्ष होणार होता. आपल्याला तोडायचे नव्हते म्हणून आपण अध्यक्षपदासाठी दीपक देशमुख यांचा एक अर्ज भाजपकडून आणि दुसरा अर्ज अपक्ष म्हणून दाखल केला होता.

जालना - येथील प्रशासकीय इमारत संकुलातील 297 हेक्‍टर जमीन शासकीय कार्यालये आणि निवासस्थानांसाठी राखून ठेवण्यात आली आहे. यापैकी 147 हेक्‍टर जमिनींचे विविध शासकीय विभागांना वाटप करण्यात आले असले, तरी उरलेल्या दीडशे हेक्‍टरमध्ये शहरातील खासगी भाड्याच्या इमारतीतील कार्यालयांना त्यांच्या हक्काच्या इमारती बांधण्यासाठी जागा उपलब्ध करून देण्याचा निर्णय शुक्रवारी (ता. तीन) घेण्यात आला, अशी माहिती जिल्हाधिकारी तुकाराम मुंडे यांनी दिली. प्रशासकीय इमारत संकुलातील जमिनीबाबतचा आढावा मुंडे यांच्या अध्यक्षतेखाली झालेल्या बैठकीत घेण्यात आला.