मुंबई - परदेशी गुंतवणूकदार संस्थांनी ब्लूचिप कंपन्यांच्या शेअरमध्ये सुरू ठेवलेली खरेदी आणि जागतिक बाजारपेठांतून मिळालेली सकारात्मक दिशा यांमुळे सलग चौथ्या दिवशी शेअर बाजारातील उत्साह कायम होता. मुंबई शेअर बाजाराचा निर्देशांक 173 अंशांनी वधारून 17,605 अंशांवर बंद झाला. बांधकाम, औषधनिर्माण, ऊर्जा, एफएमसीजी, बॅंका आणि तेल व वायू क्षेत्रातील कंपन्यांच्या शेअरना आज मागणी होती. धातू क्षेत्रातील कंपन्यांचे शेअर मात्र घसरले.

नवी दिल्ली - जागतिक आर्थिक पेच लक्षात घेऊन सध्याची कररचना तशीच ठेवावी आणि विकासदर वाढवण्यासाठी करसवलत वाढवावी, अशी मागणी उद्योजकांनी केली. केंद्रीय अर्थमंत्री सध्या अर्थसंकल्पपूर्व बैठका घेत असून, आज झालेल्या बैठकीत ही मागणी करण्यात आली. आरोग्यसेवा क्षेत्राला सेवाकरातून बाहेर ठेवावे आणि किमान पर्यायी कराचे (मॅट) सुसूत्रीकरण करावे, अशाही मागण्या करण्यात आल्या. विमानवाहतूक, आरोग्यसेवा आणि शिक्षण या क्षेत्रांना उद्योगांचा दर्जा द्यावा. मालमत्ता आणि सेवाकराची (जीएसटी) त्वरित अंमलबजावणी करावी आणि निर्यातदारांना व्याजदर सवलतीची योजना 31 मार्च 2013 पर्यंत कायम ठेवावी, अशा मागण्याही करण्यात आल्या.

ओस्लो - टू जी गैरव्यवहार प्रकरणी सर्वोच्च न्यायालयाने दिलेल्या निकालानंतर टेलिनॉर ही नॉर्वेतील कंपनी आता भारत सोडण्याची शक्‍यता आहे. कंपनीचे परवाने रद्द झाल्यामुळे कंपनी नवीन नियम तयार होण्याची वाट पाहत बसणार नाही, असे कंपनीचे मुख्य कार्यकारी अधिकारी फ्रेडरिक बकसास यांनी सांगितले. &nbsp टेलिनॉर कंपनीने युनिटेक या बांधकाम क्षेत्रातील कंपनीसमवेत युनिनॉर ही कंपनी स्थापन केली आहे. या कंपनीला मिळालेले 22 परवाने सर्वोच्च न्यायालयाने गुरुवारी रद्द केले आहेत. आता युनिनॉरला चार महिने कामकाज चालवता येणार आहे. मात्र, त्यानंतर नवीन नियमांतूनच कंपनीला सामोरे जावे लागणार आहे.

मुंबई - भारती एअरटेलच्या शेअरमध्ये आलेली तेजी, माहिती-तंत्रज्ञान, धातू आणि कॅपिटल गुड्‌स क्षेत्रातील शेअरची झालेली खरेदी आणि जागतिक बाजारपेठेतून मिळालेली सकारात्मक दिशा यांमुळे शेअर बाजारात आज सलग तिसऱ्या दिवशी तेजी कायम राहिली. मुंबई शेअर बाजाराचा निर्देशांक आज 131 अंशांनी वधारून 17,431.85 अंशांवर बंद झाला. राष्ट्रीय शेअर बाजाराचा निफ्टी मात्र 34.20 अंशांनी वधारून 5,269.90 अंशांवर बंद झाला. टू-जी गैरव्यवहार प्रकरणातील निकालांच्या पार्श्‍वभूमीवर भारती एअरटेल आणि आयडिया या कंपन्यांच्या शेअरमध्ये अनुक्रमे 6.88 आणि 2.68 टक्‍क्‍यांची वाढ झाली.

मुंबई - केंद्र सरकारने मौल्यवान धातूंच्या वायद्यांवर कर आकारणी करण्याचे ठरवले आहे. सरकारचा हा निर्णय योग्य असल्याचे सांगत ऑल इंडिया जेम्स अँड ज्वेलरी ट्रेड फेडरेशनने (जीजेएफ) याचे स्वागत केले आहे. जीजेएफने याविषयीची सूचना अर्थसंकल्पपूर्व सूचनांमध्ये केली होती. यावर गेले काही महिने सरकारबरोबर चर्चाही सुरू होती. मौल्यवान धातूंचे वायदे केले गेले तर त्यांचे भविष्यातील भाव अनावश्‍यक वाढतात. यामुळे खऱ्या ग्राहकाचा तोटा होतो आणि त्याला हे मौल्यवान धातू महाग मिळतात. त्याच वेळी त्यांची आंतरराष्ट्रीय बाजारातील किंमत तितकी नसते.

मुंबई - इंडसइंड बॅंकेने तीन नव्या सेवा सुरू केल्या आहेत. यामध्ये कॅश ऑन मोबाईल, डायरेक्‍ट कनेक्‍ट आणि क्विक रिडिम सर्व्हिस या सेवांचा समावेश आहे. गेल्या वर्षी बॅंकेने चॉइस मनी एटीएम, चेक ऑन चेक आणि 365 डेज बॅंकिंग या सेवा सुरू केल्या होत्या. एकाच दिवशी तीन सेवा करण्याचे सूत्र या वर्षीही बॅंकेने पाळले आहे. कॅश ऑन मोबाईल सुविधेमुळे ग्राहक मोबाईलच्या साह्याने पैशाची देवाणघेवाण करू शकेल. यासाठी ग्राहकाला मोबाईल ऍप्लिकेशन डाऊनलोड करण्याची गरज भासणार नाही. पैसे घेणाऱ्याचे मोबाईल ऍप्लिकेशन वापरून हा व्यवहार होऊ शकणार आहे.

सिऍटल - ऍमेझॉन डॉट कॉम या जगप्रसिद्ध ऑनलाइन शॉपिंग स्टोअरने भारतीय आवृत्ती आज (गुरुवार) सुरू केली. जंगली डॉट कॉम (junglee.com) असे भारतीय वेबसाइटचे नाव आहे. जगभरातील चौदा हजार ब्रॅन्ड्‌सची 1.2 कोटी उत्पादने भारतीय आवृत्तीत उपलब्ध असतील, असे "ऍमेझॉन'ने म्हटले आहे. "जंगली'मुळे भारतीय ऑनलाइन बाजारपेठेतील ई कॉमर्सला यामुळे आणखी चालना मिळणार आहे. सध्या भारतात 46 हजार कोटींची ई कॉमर्सची बाजारपेठ आहे. प्रामुख्याने प्रवासासाठी इंटरनेटवरून तिकिटे विकत घेण्याच्या व्यवहारात भारतीय यूजर्स आता पुरेसे सरावले आहेत. गेल्या दोन वर्षांत इंटरनेटवरून वस्तू विकत घेण्यासही मोठ्या प्रमाणात सुरवात झाली.