महेश पाटीलचा अटकपूर्व जामीन फेटाळला

म. टा. वृत्तसेवा, ठाणे नगरसेवकाच्या हत्येची सुपारी देणारा कल्याण-डोंबिवली महापालिकेतील भाजपचा फरारी नगरसेवक महेश पाटील याने अटक टाळण्यासाठी कल्याण सत्र न्यायालयापासून मुंबई उच्च न्यायालयापर्यंत धाव घेतली. मात्र, बुधवारी मुंबई उच्च न्यायालयाने अटकपूर्व जामीन अर्ज फेटाळून लावत त्याला गुरुवारी कल्याण न्यायालयात हजार राहण्याचे आदेश दिले आहेत, अशी माहिती ठाणे खंडणी विरोधी पथकातील पोलिस निरीक्षक राजकुमार कोथमिरे यांनी दिली. त्यामुळे महेशवर अटकेची टांगती तलवार कायम आहे. नगरसेवक कुणाल पाटील यांच्या हत्येची सुपारी महेश याने दिली होती.

जिल्हा ग्रंथालय संघाचे वार्षिक अधिवेशन २१ रोजी

म. टा. वृत्तसेवा, ठाणेसुवर्ण महोत्सवी वर्ष साजरे करणाऱ्या ठाणे जिल्हा ग्रंथालय संघाचे वार्षिक अधिवेशन रविवार, २१ जानेवारी रोजी होणार आहे. मराठी ग्रंथ संग्रहालयात सकाळी दहा ते दुपारी साडेचार या वेळेत होणाऱ्या या अधिवेशनात वाचनसंस्कृतीसह सध्याच्या ग्रंथालयांची स्थिती अशा विविध विषयांचा वेध घेतला जाणार आहे.जिल्ह्याला वाचन संस्कृतींची शिकवण देत विविध ग्रंथालयांचे नियमन करणारा ठाणे जिल्हा ग्रंथालय संघ यंदा सुवर्णमहोत्सवी वर्ष साजरे करत आहे. त्यानिमित्ताने वर्षभरात विविध कार्यक्रम, उपक्रम यांचे आयोजन करण्यात आले असून येत्या रविवारी ठाण्यात हे अधिवेशन भरणार आहे. यंदाचे ४९वे अधिवेशन आहे.

दुसऱ्या मजल्यावरून पडून विद्यार्थिनी जखमी

म. टा. वृत्तसेवा, अंबरनाथ अंबरनाथ पश्चिम भागात असलेल्या फातिमा शाळेतील सहावीतील एक विद्यार्थिनी दुसऱ्या मजल्यावरील आपल्या वर्गातील खिडकीजवळ बसली असताना, तिचा तोल गेल्याने ती खाली पडली. या अपघातात विद्यार्थिनी जखमी झाली असून तिला उपचारासाठी ठाणे येथील रुग्णालयात दाखल करण्यात आले आहे.अंबरनाथ पश्चिम भागात फातिमा ही इंग्रजी माध्यमाची शाळा आहे. या शाळेत सहावीत अर्चना दत्त ही विद्यार्थिनी शिकत आहे. बुधवारी सकाळी ती शाळेत आली आल्यावर मधल्या सुट्टीत दुसऱ्या मजल्यावरील आपल्या वर्गात खिडकीजवळ बसली होती. यावेळी तिचा तोल जाऊन ती थेट खिडकीच्या बाहेर पडली.

ठाणे स्टेशनवर लोकलला आग; एक डबा खाक

ठाणे: ठाणे रेल्वे स्थानकातील प्लॅटफॉर्म क्रमांक एकच्या सायडिंगला जाणाऱ्या लोकलला मध्यरात्री दीड वाजण्याच्या सुमारास अचानक आग लागली. त्यात २०१०-बी हा डबा जळून खाक झाला आहे. ही आग नेमकी कोणत्या कारणामुळं लागली हे स्पष्ट होऊ शकलं नाही. आगीचे वृत्त कळताच अग्निशमन दलाच्या सहा गाड्या घटनास्थळी दाखल झाल्या. जवानांनी शर्थीचे प्रयत्न करून आग आटोक्यात आणली. आग लागली तेव्हा लोकलमध्ये कुणीही नव्हतं. त्यामुळं जीवितहानी झाली नाही. मात्र, या दुर्घटनेत गाडीचे मोठे नुकसान झाले. मोबाइल अॅप डाउनलोड करा आणि राहा अपडेट

ज्यू बांधव पितृभूमीकडे!

किशोर कोकणे, ठाणे जगभरात विखुरलेला ज्यू समाज पुन्हा एकत्र यावा, यासाठी ‘लॉ ऑफ रिटर्न’ हा नियम तयार करण्यात आला आहे. वेगवेगळ्या देशांमध्ये वास्तव्याला असताना बळावलेली असुरक्षेची भावना, इस्राइलचा होत असलेला विकास आणि समाजबांधवांमध्ये एकोप्याने वास्तव्य करण्याच्या इच्छेपोटी ठाण्यातील अनेक ज्यू बांधव पुन्हा आपल्या मूळ देशात स्थलांतरित होत आहेत. भारत ही आमची मातृभूमी असली तरी आमच्यापैकी अनेकांनी आता पितृभूमीत वास्तव्याला प्राधान्य देण्याचा निर्णय घेतल्याची माहिती इंडियन ज्युईश फेडरेशनचे माजी सचिव इजरा मोझेस यांनी ‘मटा’ला दिली.